Naceu en Cirimido (Italia) en 1977

No 2003, licenciouse con matrícula de honra en Ciencias da Comunicación na Universidade IULM de Milán, cunha tese titulada "Para unha xeografía do cine. A rexionalización do cine español: o caso de Galicia". Asistiu a cursos de teatro, música e fotografía.

En 2006 gañou o Premio Artivisive San Fedele (Milán, Italia), coa curtametraxe experimental "Il furto della zucca", gravado entre Suíza e Italia.

Dende o 2006 ata o 2010 traballou como programador, animador cultural e redactor de publicacións na Fundación Cultural San Fedele de Milán.

Docente e coordinador de ciclos de cine, xornalista publicista e critico audiovisual, colabora e colaborou con varios medios e institucións, entre outros, a revista de cine Duellanti, o Instituto Cervantes de Milán, o CGAI da Coruña, a Esap de Porto, a Universidade de Vigo e Onda Cero Ourense onde conduce o programa semanal dedicado ao cine Butaca Cero.

Formou parte do xurado na XV edición do Festival Internacional de cine de Ourense, na VIII Mostra Internacional de Escolas de Cinema de Porto e no 17th Avanca Film Festival.
Pelerinaxes é a súa última longametraxe. O filme gañou o Premio como Mellor Documental no 21º Avanca International Film Festival (Portugal), o Premio como Mellor Documental no Festival Internacional de Cinema Paisagens (Portugal). Ademáis a editorial Galaxia publicou no 2016 unha edición Dvd-libro do filme.
Ademais dos seus propios proxectos distribuíu o documental Frankenstein-04155 de Aitor Rei.
Dende o 2019 produce e conduce o programa Cinephilia para Telemiño.

Dende o 2010 vive en Ourense onde fundou a produtora e distribuidora Noveolas Producciones.